Það er alltaf ákveðin tímamót þegar nemendur kveðja grunnskólann sinn við formlega útskrift á hverju vori. Margir útskrifarnemendur hafa jafnvel eytt öllum tíu grunnskólaárunum í sama skóla og eiga því ótal minningar úr skólastarfinu. Það er von okkar í Lækjarskóla að gamlir nemendur hugsi hlýlega til skólans og eigi ánægjulegar minningar úr skólagöngu sinni.

Í dag gáfu þrír fyrrum nemendur sér tíma til að líta við í Lækjarskóla, þrátt fyrir að vera komnar í langþráð jólafrí úr framhaldsnámi, og heilsuðu upp á gamla vini. Hvað er einmitt betra en að verja frítíma sínum í að rölta um ganga Lækjarskóla, hitta gamla kennara og annað starfsfólk og setjast svo slakar niður og rifja upp sögur frá grunnskólagöngunni?

Við þökkum þessum fyrrum nemendum kærlega fyrir heimsóknina.